Amerika Birləşmiş Ştatlarının Milli Arxivi 1940-cı illərə aid bir sıra məxfi sənədləri ictimaiyyətə açıqlayıb. Sənədlər 1940-cı illərdə ölkə rəhbərliyinin Sovet xüsusi xidmət orqanlarının Katın meşəsində polyak hərbi əsirlərini kütləvi şəkildə qətlə yetirməsini bildiyini sübut edir. Sənədlərdən məlum olur ki, 1943-cü ildə Almaniyadakı amerikalı hərbi əsirlər öz ölkələrinə Katın meşəsində baş verənlər barədə şifrələnmiş məlumatlar göndərirmiş.
Analitiklər hesab edirlər ki, Ruzvelt Stalinin reaksiyasından qorxduğu və müttəfiqlər arasında narazılığın olmasını istəmədiyi üçün bu məsələni qaldırmayıb.
Qeyd edək ki, Polşa faşist Almaniyası ilə SSRİ arasında bölündükdən sonra 1940-cı ildə 22 minə yaxın polyak hərbçi, məmur və ictimai xadim gizlicə güllələnmiş, onlardan 4500-ü Smolensk yaxınlığındakı Katın meşəsində qətlə yetirilmişdi. Moskva bu faciə ilə əlaqəsini 1990-cı ilədək təkzib etmişdi.
